🟦🟥من روائع عكير الدامر :
ﻫﻤّﻚ ﻛﺎﻥ ﺟﺒﻞ ﻟﻮﻙ ﺍﻟﺼﺒﺮ ﺑﺘﻬِﺪُّﻭ
ﻣﺸﻮﺍﺭﻙ ﻃﻮﻳﻞ ﻛﺮِّﺏ ﻟﺠﺎﻣﻚ ﺷِﺪُّﻭ
ﻛﻔﻚ للضعيف ﺑﺎﻟﺤﺴﻨﺔ ﺩﺍﻳﻤﺎ ﻣِدُّﻭ
ﻭﺍﻟﺒﺎﺏ ﺍﻟﺒﺠﻴﺐ ﺍﻟﺮﻳﺢ أﺧﻴﺮ ﻟﻚ ﺳِﺪُْﻭ
اﻏﺘﻨﻢ ﺍﻟﺸﺒﺎﺏ ﻗﺒﻞ ﺍﻟﺮﻭﻳﺲ ﻣﺎ ﻳﺸﻴﺐ
ﺍﻟﻌﺎﻗﻞ ﺩﻭﺍﻡ ﻟﻲ ﻧﻔﺴﻮ ﺑﺒﻘﻰ طبيِّب
ﻣﺎ ﺗﺨﻠﻴﻚ ﻋﺠﻮﻝ ﺍﻟﻌﺠﻠﺔ ﻣﺎ ﺑﺘﺼﻴِّﺐ
ﺩﺭﺏ ﺍﻟﻤﻬﻠﺔ ﻟﻠﺤﻮﻝ، إﻥ ﺻﺒﺮﺕَ ﻗﺮﻳِّﺐ
ﺧﺎﻳﻨﺔ ﺍﻟﺪﻧﻴﺎ، ﻣﺮات ﺗﺸﻮﻓﺎ ﻭﺟﻴﻬﺔ
لامن ﺗﻔﺘﻨﻚ ﺑﻲ ﺯُﺧﺮُﻓﺎ ﻭﺑﻲ ﺗﻴﻬﺎ
أﺣﺴﻦ ﺗﻨﺴﺘﺮ ﻣﻦ ﺍﻟﺒﻼﻭﻱ ﺍﻟﻔﻴﻬﺎ
ﺩﺍ ﺍلبيرقص ﺑﻘﻮﻟﻮ ﺩﻗﻴﻨﺘﻮ ﻣﺎ بغتِّيها
ﻣﻄﻠﻮﻕ ﺍﻟﻠﺴﺎﻥ ﺍﺧﺘﺎﻫﻮ ﻻ ﺗﺒﺎﺭﻳﻬو
ﺩﺭﺏ ﺍﻟﺤﺴﻜﻨﻴﺖ ﺷﻮﻑ ﺍﻟﺒﻼﻭﻱ ﺍﻟﻔﻴﻬﻮ
ﻭﻟﺪﻙ ﺑﻲ ﻛﺘﺎﺏ ﺍﻟﻠﻪ ﺍﻟﻜﺮﻳﻢ ﺭﺑﻴﻬﻮ
ﻭﺇﻥ ﻛﺒﺮ ﺍﻟﻮﻟﺪ ﻻ تعاندو ﺑﻞ ﺧﺎﻭﻳﻬﻮ
ﺧﺎﻭﻱ ﺍﻷﻏﺒﺶ ﺍﻟﺤﺎﻓﻆ ﺍﻟﻜﺘﺎﺏ ﻭﺍلمِلَّة
ﺭﺍﻓﻊ ﺭﺍﺳﻮ ﻓﻮﻕ، ﻣﺎﺑﺮﺿﻰ ﻋﻴﺸﺔ ﺍﻟﺬِلَّة
أﺑﻌﺪ ﻣﻦ ﻃﺮﻳﻖ ﺍﻟﻤﺎﺑﻘﻮﻝ بِسمِلَّة
ﻭﺍﻟﺠﺎﺭ ﺍﻟﻔﺴِﻞ أﺣﺴﻦ ﺗﺴﻴﺒﻠﻮ ﺍﻟﺤِﻠَّﺔ
ﻋﻴﺶ ﻓﻲ ﺍﻟﺪﻧﻴﺎ ﺿﻴﻒ ﺍﻋﻤﻞ ﺣﺴﺎﺏ ﻳﻮﻡ ﺑﺎﻛﺮ
وﺍﺳﺠﺪ ﻟﻠﻜﺮﻳﻢ أﺑﻘﺎﻟﻮ ﺣﺎﻣﺪ ﻭﺷﺎﻛﺮ
ﺍﺳﺘﻐﻔﺮ ﻛﺘﻴﺮ ﻣﺎ ﺗﻨﺴﻰ ﺧﻠﻴﻚ ﻓﺎﻛﺮ
ﺍﻟﻤﻮﺕ ﺑﻠﺤﻘﻚ ﻟﻮ ﺑﺤﺮﺳﻮﻙَ ﻋﺴﺎﻛﺮ
أﺻﻠﻮ ﺍﻟﻤﻮﺕ ﻧﻬﺎية
للبشر ﺣﺘﻤﻴﺔ
ﻻ ﻭﺍﺳﻄﺎﺕ ﺑﺘﺸﻔﻊ ليكَ، ﻻ ﺟﻮﺩﻳﺔ
ﺭﺑﻨﺎ ﻓﻲ ﺍﻟﻜﺘﺎﺏ أﺩﺍﻧﺎ ﺣُﺠَّﺔ ﻗﻮﻳﺔ
ﻗﺎﻝ ﺍﻟﻤﻮﺕ ﺑﺠﻴﻚ ﻟﻮ ﻓﻲ ﺑﺮﻭﺝ ﻣﺒﻨﻴﺔ
ﺷﺎيفِك ﻳﺎ ﻧﻔِﺲ ﻓﻲ ﺍﻟﻔﺎﺭﻏﺔ ﻳﻮمي تجوطي
ﻓﻲ ﺍﻟﻐﻲ ﻭﺍﻟﻀﻼﻝ ﻣﻦ ﺑﺪﺭﻱ ﻗﺎﻋﺪﺓ تسوﻃﻲ
ﺑﺎﺏ ﺍﻟﺘﻮﺑﺔ ﻣﻔﺘﻮﺡ ليكْ قَبُل ﻣﺎ ﺗﻤﻮﺗﻲ
ﻭﺍﻥ ﻭﻗﻊ ﺍﻟﻘﺪﺭ، ﻭﺭﻳﻨﻲ ﻭﻳﻦ ﺑﺘﻔﻮﺗﻲ
ﻳﺎ ﺭﺏ ﺍﻟﻌﺒﺎﺩ ﺿﻮِّ ﺍﻟﻘﺒﻮﺭ ﺍﻟﻌﺎﺗﻤﺔ
ﻭاشفِﺻﺪﻭﺭﻧﺎ ﻣﻦ ﺷﺮ ﺍﻟﻬﻤﻮﻡ ﺍﻟﻜﺎﺗﻤﺔ
ﻳﺎﺭﺑﻲ ﺍﻟﺬﻧﻮﺏ ﺻﺒﺤﺖ ﻋﻠﻲ ﻣﺘﺮﺍﻛﻤﺔ
ﺍﻏﻔﺮ ﻳﺎ ﻛﺮﻳﻢ ﻭﺍﺭﺯﻗﻨﺎ ﺣﺴﻦ الخاتمة